يا شعب ياللي متعود تنام
لما تنام دلوقتي يبقي حرام
من يوم ميلادك وانت راضي
النيل حباك أخصب أراضي
وافقت ع الظلم وقولت عادي
بعت الكرامة علشان طعام
قعدت جنب النيل وقولت ده استقرار
هزرع انا وهحصد أحسن ثمار
صحيح وصلت المجد وبنيت العمار
بس كتير ضيعت وقتك في الكلام
يا شعب ياللي متعود تنام
لما تنام دلوقتي يبقي حرام
رضيت بفرعون وفرعنته عليك
بنيت له اعظم مملكة بايديك
سخرت نفسك للي يحكم فيك
ونكست راسك ورفعت له الأعلام
يا شعب ياللي متعود تنام
لما تنام دلوقتي يبقي حرام
عدت ألاف السنين ولسة طبعك فيك
لو حد ظالم حكمك هتقول عليه بيحميك
حتي كمان الحارة عملت فيها فتوة
رميت وراك العدل واختارته عشان القوة
أول ما ظلمك أنت وهان كرامتك هو
رفعته علي الأكتاف وقولت اسم الله عليك
عدت ألاف السنين ولسة طبعك فيك
عدت حبة سنين يعني مش كتار
وجه عليك ظباط بيقولوا قال أحرار
عملوا انقلاب عسكري وقالوا احنا ثوار
رفعتهم ع الراس وقولت مصلحة ليك
وجه عليك ناصر قال ناصر الفقرا
هان الكرامة بردو وزود القهرة
خلي الفقير فقير والاغنيا فقرا
ولما مات رثيته والدمعة في عنيك
عدت الاف السنين ولسة طبعك فيك
زادت عليك الألام من تاني من بعده
سادات خلاها تخرب وخان معاك وعده
ومبارك الظلام سكن البلاد عنده
وقامت الثورة علشان تصحيك
عدت ألاف السنين ولسة طبعك فيك
يا شعب ياللي نايم ع الكنبة متغطي
يا تكمل النومة يا تقوم بقي وتخطي
عمال تعاند ليه في اللي جاب الكرامة
لما تعاند فيه
علي روحك انت بتقضي
بتقول سيبونا نعيش
وبكرة جاي الضي
بقي هو ده رأيك ؟
من امتي كان لك رأي
بتنادي ع العسكر وتتحامي فيهم
بكرة أنا هقدر وأهدها عليهم
ارجع بقي واعقل
وافهم بقي المرة دي
لازم بقي تعرف
الظلم مش شئ عادي
حقك هجيبوا ليك
ما تيلا مد ايديك
لو بعتني للعسكر
بكرة يدوسوا عليك
بص بقي لقدام
واصحي من الأوهام
يا شعب ياللي متعود تنام
لما تنام دلوقتي تبقي حرام
