مشكلة الثورة اللي بنواجهها دلوقتي هو وصولنا لحالة غضب شديدة تجعلنا لا نفكر فيما نفعله , احنا نفسنا نجيب حقوق الناس اللي ماتت واللي كل يوم بتموت بس مش عارفين ,نفسنا نموت الظباط اللي قتلوا أصحابنا واخواتنا بس مش عارفين وكمان مش متعودين علي كده فبنعمل ايه ؟!, بنروح نقف قصادهم واحنا عزل وبيطلع كام واحد يحدفوا طوب تروح الشرطة ترد علينا بالغاز والنار ويموت عدد كبير من الثوار تاني والموضوع عمال يتكرر كأننا بندور في حلقة مفرغة والسؤال ايه الحل ؟!!!!!
رأيي ان الحل اننا أولا نعرف احنا عايزين ايه ؟ , يعني عايزين نكمل ثورة سلمية ولا لأ ؟.وهل فيه جوانا ناس فعلا بلطجية ولا لأ؟ وهل فيه ناس مننا بينساقوا وراهم ولا لأ ؟ وهل وقوفنا عند وزارة الداخلية بيفيدنا في حاجة ولا لأ ؟ رأيي اننا مقدمناش أي طريق نكمل بيه الثورة غير الطريق السلمي لأننا علشان نتسلح محتاجين نعمل تنظيم مسلح يقدر يواجه كيان زي الداخلية والجيش وده صعب دلوقتي وموضوع اندساس بلطجية جوا المتظاهرين لأي عاقل هيعرف ان أسهل حاجة الداخلية ممكن تعملها انهم يبعتوا كام بلطجي يحرق ويولع وفيه ناس معانا ممكن ينساقوا وراه والحل من رأيي اننا منروحش ولا عند وزارة الدفاع ولا عند وزارة الداخلية لأننا كل مرة بنروح هناك بيموت مننا أعداد كبيرة وبتحصل حرايق بيصور للرأي العام اننا اللي عاملينها , وبتطلع أراء بتقول احنا ضد الذهاب عند وزارة الداخلية بس نعمل ايه في أطفال بتروح هناك احنا بتروح متضامنين معاهم انسانيا ده جميل وأنا بعمل كده بس لازم نعلن اننا ضد الذهاب هناك اعلاميا ونعمل حملة اعلامية ضد الذهاب هناك ونبطل مناشدة الداخلية انهم يوقفوا الضرب لأنهم استمتاعهم كله بقتلنا والدولة عبارة عن عصابة بنواجهها فمينفعش نحتكم معاهم للقانون أو الانسانية لأنهم لا يعرفونهما , من الأخر دلوقتي احنا مش في دولة واللي عايز ياخد حقه بايده ياخده واللي مش عارف يجرب الحلول السلمية لكن مينفعش نفضل واقفين في النص علشان في الأخر مش بناخد حقنا وكمان بنضحي بنفسنا .
ليست هناك تعليقات:
إرسال تعليق